O IES Daviña Rey acolle unha nova edición das Xornadas de Tecnoloxía, evento que organiza a Asociación do Profesorado de Tecnoloxía de Galicia (APTG) e que coordina Pablo Blanco Quiroga, socio da entidade e docente do centro. Será a primeira vez que se organicen en Monforte e o Daviña foi escollido de entre dúas propostas que tiña a asociación enriba da mesa para este ano.
O programa de actividades inclúe, na primeira xornada deste 13 de marzo pola mañá, unha visita guiada ao Museo do Ferrocarril de Galicia e visitas ás empresas monfortinas Fenestra e Ramiro Vila. Pola tarde haberá dúas conferencias: ás 16:00 h. unha sobre a historia do patrimonio industrial ferroviario a cargo do Director do Museo do Ferrocarril de Galicia, Luis Blanco; e outra charla a cargo de Alejandro González, antigo mestre do IES Daviña Rey e creador do primeiro videoxogo de Galicia. Este último estará acompañado por un dos presidentes do MUVI (Museo do videoxogo) de Cangas.
FORMACIÓN E REUNIÓNS
As xornadas tamén darán a oportunidade de seguir varios obradoiros de formación nas dúas xornadas de venres e sábado. As deste venres serán a partir das 18:00 h. e as do sábado 14 en sesións de mañá e de tarde. Pola mañá de 10 a 14:00 h; e de tarde de 16:00 a 20:00 h. Concretamente haberá sesións dedicadas á Intelixencia Artificial, á domótica, á ciberseguridade e ao eclipse solar deste verán.
A maiores das actividades e os obradoiros, tamén se contemplan reunións para poñer en común proxectos e ideas e a asemblea xeral da entidade organizadora (APTG) o sábado ao mediodía.
O artigo Xornadas de Tecnoloxía no IES Daviña Rey de Monforte publicouse primeiro en Xornal de Lemos.
