Renfe ofrece entre o 11 de marzo e o 1 de abril de 2025 un desconto do 15% nos billetes de interrail, que permiten viaxar por 33 países europeos. A viaxe adquirida poderase iniciar ata 11 meses despois da data de compra. Segundo lembra Renfe na súa nota de prensa, Interrail é un pase persoal e intransferible que se pode adquirir e utilizar por persoas residentes da maioría de países europeos. Con el pódese viaxar máis de 30.000 destinos en todo o continente.
Para esta modalidade de transporte existen diferentes categorías. Ademais da de adulto, está a nova, dispoñible para menores de 28 anos; a senior, deseñada para maiores de 60 anos, e a de neno, para menores de entre 4 e 11 anos que viaxen acompañados dun adulto, limitado a dous pases de neno por adulto.
Así mesmo, o Interrail ofrece dous tipos diferentes de billete, o Global Pass, que permite viaxar polos 33 países con validez de entre 15 días e tres meses, e o Interrail One Country para viaxar dentro dun país durante un período de entre 3 e 8 días. Da oferta queda excluído o billete One Country Switzerland. O prezo dos billetes Interrail vai desde os 43 euros para o billete novo para viaxar tres días nun mes ata os 1.032 euros que conta un billete de adulto para viaxar durante tres meses.
