Compostela, 17 de maio de 2025 – A plataforma cidadá Queremos Galego voltou a encher as ruas de Compostela com motivo do Dia das Letras Galegas, reunindo milhares de pessoas na manifestaçom nacional convocada sob o lema “Língua vital já! Paremos a emergência linguística”.
A mobilizaçom, que partiu da Alameda e culminou na Praça do Obradoiro, contou com a participaçom de coletivos sociais, culturais, sindicatos, centros de ensino e representantes institucionais. O ato final rematou com umha grande foliada pola língua animada pola atriz Isabel Risco, que sublinhou a força da língua galega na rua e na cultura popular.
Durante o evento foi lançado o processo participativo “Língua Vital”, com o objetivo de avaliar o grau de incumprimento dos compromissos em matéria de política linguística e promover propostas concretas para garantir a presença efetiva do galego em todos os âmbitos da sociedade.
Entre as iniciativas mais destacadas, Queremos Galego impulsionou a Declaraçom dos Concelhos pola Língua Galega, à qual já se aderírom mais de 60 câmaras municipais do país, comprometendo-se com medidas ativas a favor da normalizaçom lingüística. Além disso, ao longo do mês de abril e começos de maio, realizárom-se mais de vinte plenários comarcais, envolvendo a vizinhança na preparaçom da mobilizaçom.
Este 17 de maio contou também com umha homenagem à tradiçom oral e às pandeireteiras, destacando o papel das mulheres galegas como transmissoras da cultura e da língua de nosso.
Queremos Galego sublinha a urgência de frear o retrocesso do uso do galego e exixe vontade política real por parte das instituiçons para garantir os direitos linguísticos da cidadania galega.
Para mais informaçom:
[www.queremosgalego.gal](http://www.queremosgalego.gal)
[info@queremosgalego.gal](mailto:info@queremosgalego.gal)
A entrada Queremos Galego reclama medidas urgentes contra a emergência linguística e mobiliza milhares de pessoas em Compostela apareceu primeiro en Olhaparo.
