Durante o evento de celebración do décimo aniversario de Kojima Productions estreouse o novo trailer de OD, un proxecto con selo de Xbox Game Studios que promete redefinir os límites entre xogo e cine interactivo, que Hideo Kojima confirmou que o seu desenvolvemento está «ben encamiñado» e conta co apoio técnico de Microsoft.
A actriz Sophia Lillis, coñecida por filmes como IT e Dungeons & Dragons: Honor Entre Ladrones, protagoniza un avance que evoca directamente o espírito de P.T., un adianto do xogo Silent Hills que rematou sendo cancelado (convertendo esta breve experiencia nalgo único). No tráiler, Lillis aparece nunha habitación desolada, acendendo candeas mentres sons inquietantes e fenómenos sobrenaturais (como sangue fluíndo dunha vela ou vermes saíndo doutra) envolven a escena. A tensión culmina coa aparición dunha entidade que a agarra pola cara, nunha secuencia que destaca pola precisión emocional da interpretación dixital, grazas á tecnoloxía Meta Human de Unreal Engine.
Phil Spencer, responsable de Xbox, definiu OD como «audaz, único e inconfundiblemente desta produtora», subliñando que o traballo con Unreal Engine está a permitir avances visuais que superan incluso os acadados en Death Stranding 2. Kojima, pola súa banda, cualificou o proxecto como avant-garde, centrado no medo e na posibilidade de «sobredose emocional», o que dá nome ao xogo.
Aínda que non hai data de lanzamento confirmada, OD está previsto para Windows e Xbox Series X|S, aínda que non se descarta unha chegada a outras plataformas. O título, subtitulado Knock, parece formar parte dun universo narrativo máis amplo, no que tamén participa o cineasta Jordan Peele, aínda que o seu papel específico está pendente de desvelar.
Tráiler de OD
