- Imaxe de despedida de Tomonobu Itagaki
O mundo dos videoxogos está de loito tras confirmarse o falecemento de Tomonobu Itagaki, icónico creador das sagas Dead or Alive e Ninja Gaiden, aos 58 anos. A noticia foi divulgada hoxe, poucas horas despois de que se publicase unha mensaxe póstuma no seu perfil de Facebook, encargada a un amigo íntimo para ser difundida no momento da súa morte.
Na emotiva despedida, Itagaki reflexiona sobre a súa traxectoria: «A luz da miña vida está esmorecendo. A publicación desta mensaxe significa que chegou o momento. Xa non estou neste mundo. A miña vida foi unha serie de batallas. Fun gañando. Tamén causei moitos problemas. Estou orgulloso de ter seguido as miñas crenzas e loitado ata o final. Non teño remorsos. Porén, dóeme non ter entregado unha nova obra aos meus seguidores. Perdoade. Así é vida».
A súa carreira comezou en Tecmo en 1992, traballando inicialmente en gráficos para Tecmo Super Bowl. O seu estilo provocador e a súa estética inconfundible (sempre con lentes de sol) fixéronse patentes coa creación de Dead or Alive en 1998, unha franquía que destacou polo seu motor gráfico e pola polémica física dos personaxes femininos. En 2004, revitalizou Ninja Gaiden como exclusiva de Xbox, consolidando o seu prestixio como deseñador de acción hardcore.
Tras unha ruptura pública con Tecmo en 2008, Itagaki fundou Valhalla Game Studios e lanzou Devil's Third. En 2021, anunciou a creación de Itagaki Games, tras catro anos dedicados á docencia en desenvolvemento de videoxogos.
A comunidade reaccionou con dor e respecto. Team Ninja, o estudio que el puxo no mapa, emitiu un comunicado: «Continuaremos coa filosofía e creatividade que Itagaki-san iniciou». Pola súa banda, James Mielke, cofundador de BitSummit, escribiu: «RIP, senpai. Sempre serás un ninja».
A súa morte chega poucos días antes do lanzamento de Ninja Gaiden 4, título co que non estivo vinculado. A súa ausencia deixa un baleiro creativo, mais o seu legado permanece intacto entre os xogadores e desenvolvedores que medraron co seu estilo inconfundible.
As entregas de Ninja Gaiden que revolucionou Itagaki están actualmente dispoñibles nunha colección coas súas versións remasterizadas
